Ансамбль ударных інструментаў «Рымшот» – адзін з найбольш арыгінальных калектываў школы быў створаны ў 1990 годзе на базе класа ўдарных інструментаў настаўніка Вольгі Уладзіміраўны Дарыенка.
Практычна ўвесь клас навучэнцаў з вялікім энтузіязмам стаў выступаць на шматлікіх канцэртах, фестывалях і конкурсах у складзе зноў створанага ансамбля. Пад кіраўніцтвам Вольгі Уладзіміраўны «Рымшот» стаў лаўрэатам тэлевізійнага конкурсу-фестывалю «Усе мы родам з дзяцінства» (1994), фестывалю самадзейнай творчасці «Спадчына» (1997), фестывалю народнай творчасці «Сузор’е» (1994, 209, 209 , 2009, 2013), Адкрытага фестывалю «Джаз на Каляды» (2004), Міжнароднага фестывалю-конкурсу «Jazz fontanas» (Літва, 2006), Адкрытага дзіцячага фестывалю-конкурсу джазавай і эстраднай музыкі «JAZZ-TIME» (Салігорск, 2006), быў адзначаны падзякай міжнароднага этнакультурнага фестывалю «07» -конкурсу «Я гуляю джаз» (2012).
Яркімі ўражаннямі былі напоўнены канцэртна-творчыя паездкі калектыву ў Германію (1992), ЗША (1994), Літву (2002).
У 1994 годзе пастановай калегіі Міністэрства культуры Рэспублікі Беларусь за дасягнутыя поспехі ў развіцці самадзейнай музычнай творчасці, за актыўную канцэртную дзейнасць ансамблю было прысвоена званне «Узорны самадзейны калектыў».
З 2015 года і па цяперашні час калектывам кіруе настаўнік па класе ўдарных інструментаў Аляксандра Сяргееўна Ганькова, канцэртмайстар калектыву – таленавіты піяніст Эльдар Эльмаравіч Шырынаў.З прыходам гэтых выдатных музыкаў былі рэалізаваны новыя цікавыя ідэі, што, несумненна, адбілася на напрамку і змесце рэпертуару, аснову якога склалі аўтарскія пераклады і інструментоўкі кіраўніка. У калектыве займаюцца 8 юных выканаўцаў на чале з настаўнікам, прадстаўлены ўсе традыцыйныя ўдарныя інструменты.
За сваю творчую дзейнасць, яркую самабытнасць, высокі ўзровень выканальніцкага майстэрства «Рымшот» быў адзначаны ўзнагародамі наступных фестываляў і конкурсаў: IV Міжнароднага конкурсу мастацтваў «Хрустальны васілёк» (лаўрэат I ступені, Мінск, 2019), фестывалю народнай творчасці «Сузор’е» (лаўрэат II ступені Мінск, 2017, 2020, лаўрэат I ступені, Мінск, 2024), Міжнароднага конкурсу мастацтваў «Львяня запрашае сяброў» (лаўрэат I ступені, Ліда, 2021), Адкрытага фестывалю-конкурсу «Златагорская вясёлка», Мінск, 2024).Дзякуючы сваёй актыўнай творчай дзейнасці калектыў не раз быў запрошаны ў прафесійныя праекты Дзяржаўнага камернага аркестра Рэспублікі Беларусь пад кіраўніцтвам заслужанага артыста Расіі Яўгена Бушкова.У 2018 годзе ансамбль «Рымшот» выступіў у праграме канцэрта аркестра, у 2019 – у канцэрце «Чароўны барабан» дзіцячага абанемента «Класіка-гэта класна!» у Вялікай зале Белдзяржфілармоніі.
У 2023 і 2024 гадах ансамбль «Рымшот» стаў удзельнікам рэспубліканскага праекта Беларускай Перкусійнай асацыяцыі «Музыка рытму». Нягледзячы на тое, што ў канцэртах праекта традыцыйна выступаюць толькі прафесійныя музыканты, гледачы канцэртнай залы «Верхні горад» цёпла і з любоўю прынялі выступленні адзінага дзіцячага калектыву.
Сярод найбольш яскравых і запамінальных выступленняў ансамбля – аўтарскі праект Аляксандры Сяргееўны Ганьковай «Рымшот запрашае сяброў». Праект рэалізуецца з 2021 года штогод у фармаце «open air» на адкрытай пляцоўцы школы для жыхароў Савецкага раёна.
