18 снежня 2021 года ў 17:00 у Вялікай канцэртнай зале Беларускай дзяржаўнай філармоніі (пр. Незалежнасці, 50) адбудзецца святочны канцэрт, прысвечаны 95-годдзю ДУА «Дзіцячая музычная школа мастацтваў № 1 імя Л.П. Александроўскай г. Мінска».
Дзіцячая музычная школа мастацтваў № 1 імя Л.П. Александроўскай г. Мінска была заснавана ў 1926 годзе як першая дзяржаўная музычная школа ў горадзе. За гады сваёй дзейнасці школа ўнесла значны ўклад у станаўленне нацыянальнай сістэмы навучання і эстэтычнага выхавання падрастаючага пакалення, стала адным з метадычных цэнтраў музычнага адукацыі ў Рэспубліцы Беларусь.
У цяперашні час высокі ўзровень падрыхтоўкі навучэнцаў забяспечвае прафесійны педагагічны калектыў, які спалучае ў сабе сплаў вопыту і маладосці. Многія з настаўнікаў школы ўзнагароджаны дыпломамі і граматамі на міжнародных і рэспубліканскіх конкурсах за высокае прафесійнае майстэрства.
Установа адукацыі ганарыцца сваімі выхаванцамі, многія з якіх сталі вядомымі дзеячамі айчыннай культуры і музычнага мастацтва. Сярод іх: заслужаная артыстка БССР Таццяна Пятроўна Сцяпанава, доктар філасофскіх навук, член Беларускага саюза кампазітараў Арыядна Барысаўна Ладыгіна, кампазітар, кандыдат мастацтвазнаўства Аляксандр Анатольевіч Друкт, доктар мастацтвазнаўства, прафесар Вера Паўлаўна Пракапцова, заслужаны дзеяч мастацтваў Рэспублікі Беларусь кампазітар Уладзімір Васільевіч Дарохін. Сярод выпускнікоў школы – вядомыя маладыя эстрадныя выканаўцы Б’янка, Рыта Дакота, Вольга Калеснікава.
Яркай падзеяй для ўсіх знатакоў дзіцячай творчасці стане святочны канцэрт, у якім прымуць удзел навучэнцы і настаўнікі школы.
18 снежня 2021 года на сцэне Беларускай дзяржаўнай філармоніі выступяць дзіцячыя ўзорныя калектывы (духавы аркестр «Ліра», хор «Тоніка», аркестр народных інструментаў, ансамбль ударных інструментаў «Рым-шот», ансамбль балалаек «Залатая горка»), а таксама струнны камерны ансамбль, ансамбль саксафонаў, мандалінна-гітарны ансамбль «Акцэнт», дуэты і салісты – лаўрэаты міжнародных і рэспубліканскіх конкурсаў.
Тэл. для даведак: +375 (29) 717-61-71 e-mail: director@dms1.by